Corte: Si minister Oduber stroba FLPD di haci su trabou, lo cobr’e multa

ORANJESTAD – Pa cada biaha of dia of parti di dia cu gobierno no permiti of stroba e directiva di Fundacion Lotto pa Deporte pa haci su trabou, gobierno ta haya un multa di 2.500 florin, te na un maximo di 2.5 miyon florin. Asina huez a dicta den un sentencia diaranson den un caso cu e fundacion a entama contra gobierno di Aruba (lesa: minister di Deporte Dangui Oduber). Huez a haya legalmente proba cu despues di e sentencia di 7 di februari 2018, cu gobierno no a laga e fundacion haci su trabou (manera mester ta ) y a bay di acuerdo cu e fundacion pa impone un multa na gobierno si e continua stroba trabou di e fundacion. Algo cu normalmente huez no ta haci pasobra ta spera cu gobierno ta serio suficiente pa cumpli cu un sentencia di huez.

E CASO

Fundacion Lotto pa Deporte a hiba e gobierno corte, argumentando cu e mandatario cu ta responsabel pa e fundacion, no ta laga e fundacion haci su trabou. Como muestra, a uza parti di un conferencia di prensa di dia 7 di februari 2018 pa establece nan punto. Durante e caso, a uza suficiente citado di e conferencia pa establece cu Oduber no ta di acuerdo cu e sentencia. Ademas e directiva a presenta entre 13 pa 14 carta/email como corespondencia corespondencia cu a bay entre nan y e respectivo minister, unda cu ta sea pidi, of ordena pa tuma cierto accionnan, cu den bista di e directiva, ta stroba nan di funciona y opera manera mester ta. Mirando e situacion ey, e directiva a haya necesario pa pidi huez impone e multa. Gobierno a refuta e acusacion aki y a pidi pa laga e fundacion carga e gastonan di e caso.

17031_ennia_banner_reis_468x60px_eng

HUEZ

Den e sentencia, huez ta mustra cu den e caso aki no ta cuestion si gobierno no a of ta cumpliendo cu e sentencia di dia 3 di januari 2018 (unda cu a pidi pa retiro di henter e directiva pero no a logra esey), pasobra gobierno ta cumpliendo cu e sentencia ey y no a retira e trahadornan (aunke den corespondencia a purba haci esaki basa riba otro argumentonan presenta den corte). Loke ta e esencia, ta si ta necesario pa huez impone un multa na gobierno pa incumplimento di e sentencia anterior di dia 7 di februari 2018. Segun huez, a keda demostra den corte cu e minister ta cuestiona e sentencia anterior y no tin intencion di sea cumpli completo of parcialmente cu e sentencia di dia 7 di februari 2018, basa riba e minister su comportacion den e ultimo lunanan. Segun huez, den corespondencia e mandatario ta cuestiona decisionnan tuma, ta haci peticionnan irrealistico (kier contesta riba preguntanan den un tempo no razonable), y hopi biaha ta actua como si fuera e fundacion ta un extencion di su ministerio. Huez a mustra cu manera cu a dicta den e sentencia di dia 7 di februari 2018, e minister berdad tin derecho riba su opinion, pero esey no kier men cu e tin razon. Y si e minister kier cuestiona e sentencia, e tin cu apela esaki manera e proceso ta provee. Analisando tur e puntonan treci den corte durante e caso ultimo (di dia 4 di mei 2018), huez a mustra proba cu tin suficiente indicacion y motibo pa pensa cu e minister no a y no lo sigui tene su mes na e sentencia, y como tal ta necesario pa impone un multa. Esey no ta nifica sinembargo segun huez, cu e minister no por haci un peticion na e fundacion of pidi e fundacion pa informacion ora cu e mester. Pero e si esey resulta den un actuacion cu ta stroba e operacion di e fundacion, e huez lo impone e multa mesora. NoticiaCla a pidi reaccion di e mandatario, pero te ainda esaki no a resulta posibel. Por lesa e sentencia completo AKI.

Source: NoticiaCla http://www.noticiacla.com/news/12747

LEAVE A REPLY