Director di supermercado grandi sospecha di ta exploita trahadonan legal y ilegal

ORANJESTAD – E destino di mas of menos 33 trahado legal y un grupo ilegal di un supermercado na Aruba por ta den duda serio. Ta trata di un supermercado cu lo tin problemanan financiero y cu pa loke ta mercancia riba e shelves, ta visiblemente pober abastece. Despues di un candela hopi aña pasa, e la sa di crece hopi, pero ya awor cos ta mustra un situacion nada sano. Basa riba informacion suministra pa un fuente cu a papia cu condicion cu e ta keda anonimo, NoticiaCla a compronde cu e trahadonan aki recientemente lo a keda confronta pa e director di trabou pa informa  nan cu e lugar ta bay cera su porta y cu nan lo ta sin trabou. Si eseu tabata lo unico, lo ta un cos. Tambe varios trahado disgusta, a purba di mustra cu e director a haci esaki ‘sin previo aviso conforme ley laboral local’.  Segun e fuente nigun trahador kier a firma e acuerdo di e directeur pa por wordo retira.

LIKIDA E LUGAR

Algun di e trahadonan a keda emplea despues pero solamente pa algun dia, mientras cu e director lo tabata likida loke tabata keda. E trahadonan a dicidi di acudi na departamento di labor mirando cu nan no a confia e suma supuesto cu nan mester a haya di cesantia. Y enberdad, e calculacion lo tabata completo. Mientrastanto a compronde cu porfin e diamars a cuminsa cu e proceso pa paga e salarionan. Esey sikiera ta un problema menos, aunke cu e no ta kita e seriedad di e situacion menciona. 

17031_ennia_banner_reis_468x60px_eng

COMPANIA

Por a compronde cu e director lo tin varios NV’s mas, entrenan ta un compania di construccion di cas. E director di dicho company di contruccion lo tin un consehero legal como partner tambe, cu ta yuda y consehs dicho director den tur su asuntonan legal. Tambe a compronde cu e director lo ta acustumbra di traha cu trahadonan cu e por paga poco salario  y como tal e lo ta usa trahadonan illegal, mayoria di nan Venezolano, y lo tin un hende local cu ta haciendo negoshi cu e illegal nan aki y ta yuda distribui tur e ilegalnan pa varios sitio di construccion di e director. Nan ta cuestiona cu mientras cu yiunan di tera no ta hayando trabou, illegal si ta logrando, y ta cuestiona unda Guarda Nos Costa

VIVIENDA ILEGAL

Pa loke ta e grupo di Venezolano illegal, e director lo a provee vivienda pa biba tambe,  un parti di segundo piso ariba e joyeria nobo. Y ademas e grupo di e ilegalnan aki ta trahando scondi anochi depues cu e supermercado ta cera pa haci trabow di construction te ora laat madruga.

TRAHADO

E grupo di trahado cu a wordo ‘retira’, tin entre 7 pa 23 aña di servicio, y lo a keda sin ningun tipo di proteccion laboral. Segun ley laboral, nan lo a wordo bisa cu pa por retira un grupo di trabou asina, ta rekeri pa departamento di labor otorga un permiso, cual permiso nunca a wordo duna of pidi. Como tal tin un situacion cu no ta corecto y pa cual e trahadonan retira ta mal pega aworaki. Tin varios di trahado cu dificilmente lo por haya trabow pa motibo di nan edad. Tur e trahado nan ta sinti cu e situacion aki ta un setup pa no paga e cesantia y pre-aviso cual ta suma den miles di florin pa cada trahado.

Source: NoticiaCla http://www.noticiacla.com/news/15061

LEAVE A REPLY