E castigo mas halto pa asesinato ta bida largo

Diabierna awo pueblo henter nan atencion ta riba e caso den corte unda cu lo bay husga e mama y padrastro di e dos menornan Eugene y Rishandroh kendenan a perde nan bida debi na maltrato y negligencia di esnan cu mester a percura pa nan bienestar: esta e mama Richeila Frans y e padrastro Gabriel Martin.

17031_ennia_banner_reis_468x60px_eng

E acusacionnan cu Ministerio Publico a pone contra e dos personanan aki ta como lo siguiente: M. y F. ta wordo acusa di a intencionalmente tuma bida di un persona dor di dal’e un of varios biaha cu forsa na su cabes den e periodo di 21 di november 2017 pa 24 di november 2017.

M. y F. ta wordo acusa di a causa varios biaha lesion grave na e persona aki (esta, wesonan kibra) dor di dal’e cu forsa cu man of mokete, palo di basora of slof durante e periodo di prome di augustus 2014 te 20 di november 2017.

M. y F. ta wordo acusa di a intencionalmente tuma bida di un di dos persona dor di dal’e cu su cabes un of mas biaha cu forsa na su cabes, a consecuencia di cual e persona aki a cay y a dal su cabes contra un pochi di wc, den e periodo di prome di september 2017 pa 31 di october 2017.

M. y F. ta wordo acusa di a intencionalmente causa varios biaha lesion grave na e di dos persona aki (esta, ribchinan kibra) dor di dal e cu forsa cu man of mokete, palo di basora of slof durante e periodo di prome di augustus 2014 te prome di september 2017.

F. ta wordo acusa di a laga e dos personanan aki varios biaha y intencionalmente den un estado desampara (mientras F. tabata sa cu nan tabata wordo maltrata gravemente y cu frecuencia pa M. y cu nan no por a defende nan mes) dor di keda sin actua na ora y/of dor di keda sin hiba nan na un luga safe na ora y/of dor di keda sin proteha nan y/of dor di keda sin duna nan ayudo medico y cuido medico adecua, loke tabatin lesion grave y nan morto como consecuencia.

M. ta wordo acusa di a maltrata F. durante e periodo di prome di augustus 2014 te 24 di november 2017 dor di dal’e cu man of mokete, palo di basora of slof.

M. ta wordo acusa di a dera, sconde, transporta y disparce e curpa di e prome persona menciona den e citacion aki, cu e intencion pa sconde e hecho y causa di su morto den e periodo di prome di september 2017 te 31 di october 2017.

Pues e mama tin un acusacion mas (total 6) como mama cu mester a percura pa protege su yiunan, compara cu e padastro cu tin 6 acusacion.

Si lesa tur e acusacionnan aki por constata cu ningun caminda ta para kita bida den forma premedita. Loke ta keda ta asesinato (cu por ta intencional pero no premedita). Premedita ta ora cu ta traha a base di un plan, unda ta specifica di ki forma y ki momento ta kita e bida. Codigo Penal di Aruba ta bis cu pa asesinato, por exigi e castigo di bida largo. Pa yega na e sentencia aki, tin diferente pa tene cuenta cun’e, entre otro si e acusadonan a yega di haya nan mes den contacto cu husticia, of cu casonan similar (condena) y tambe nan salud mental ta hunga un rol na momento di demanda y impone un castigo.

Manera por corda, e caso aki a “blow out” ora cu e ruman Rishandroh a wordo interna dia 222 di november cu lesionnan pisa y a bay den coma. Despues el a fayece riba diabierna, 24 di november, 2017. Ya caba for di momento cu el a wordo interna a cuminsa e buskeda pa su ruman Eugene di 3 aña. E curpa a wordo haya riba diamars, 28 di november, dera na un area na Savaneta. A haya e curpa aki a base di confesion di e padrastro.

Diabierna na final di e caso lo haya sa kico Ministerio Publico su conclusion ta a base di tur loke cu wordo treci dilanti.

Source: 24ora http://24ora.com/e-castigo-mas-halto-pa-asesinato-ta-bida-largo/

LEAVE A REPLY